இந்தியச் செய்திகள்: 31/01/2026

மத்திய பட்ஜெட்: நிர்மலா சீதாராமன் நாளை தாக்கல் செய்கிறார்

இந்தியாவின் மத்திய பட்ஜெட் நாளை நாமன்றத்தில் தாக்கல்
செய்யப்பட உள்ளது. மத்திய நிதி அமைச்சர் நிர்மலா சீதாராமன் தொடர்ந்து ஒன்பதாவது
முறையாகப் பட்ஜெட்டை தாக்கல் செய்ய உள்ளார். இந்தப் பட்ஜெட்டில் தங்கம் மீதான
இறக்குமதி வரி மற்றும் புதிய முதலீட்டுத் திட்டங்கள் குறித்த முக்கிய அறிவிப்புகள்
வெளியாகும் என எதிர்பார்க்கப்படுகிறது. குறிப்பாக, முப்பத்து நான்கு ஆயிரம்
கோடி ரூபாய் மதிப்பிலான பவர்ஹவுஸ் திட்டம் மூலம் லட்சக்கணக்கான வேலைவாய்ப்புகள்
உருவாக்கப்பட வாய்ப்புள்ளதாகத் தகவல்கள் தெரிவிக்கின்றன.

பெரும் சரிவில் தங்கம் விலை: பொதுமக்கள் மகிழ்ச்சி

இந்தியாவில் கடந்த இரண்டு நாட்களில் தங்கம் விலை
அதிரடியாகக் குறைந்துள்ளது. சென்னையில் இன்று ஒரு சவரன் தங்கத்தின் விலை
ஏழாயிரத்து அறுநூறு ரூபாய் வரை குறைந்து, இரண்டு நாட்களில் மொத்தம் பதினைந்தாயிரத்து
இருநூறு ரூபாய் சரிவைச் சந்தித்துள்ளது. இந்தத் திடீர் விலை வீழ்ச்சி
இல்லத்தரசிகள் மற்றும் முதலீட்டாளர்கள் மத்தியில் பெரும் ஆச்சரியத்தையும்
மகிழ்ச்சியையும் ஏற்படுத்தியுள்ளது.

வங்கி மோசடி வழக்கு: ரிலையன்ஸ் நிறுவன முன்னாள் தலைவர் கைது

சுமார் நாற்பதாயிரம் கோடி ரூபாய் வங்கி மோசடி செய்ததாகத்
தொடரப்பட்ட வழக்கில், ரிலையன்ஸ் குழுமத்தின் முன்னாள் தலைவர் மற்றும் இயக்குனர்
புனித் கார்க்கை அமலாக்கத்துறையினர் கைது செய்துள்ளனர். அவரிடம் ரகசிய இடத்தில்
வைத்து தீவிர விசாரணை நடத்தப்பட்டு வருகிறது. இந்த விவகாரம் இந்தியத் தொழில்
துறையில் பெரும் பரபரப்பை ஏற்படுத்தியுள்ளது.

காஷ்மீரில் பாதுகாப்புப் படையினர் – பயங்கரவாதிகள் மோதல்

ஜம்மு காஷ்மீர் பகுதியில் பாதுகாப்புப் படையினருக்கும்
பயங்கரவாதிகளுக்கும் இடையே இன்று காலை முதல் துப்பாக்கிச் சண்டை நடைபெற்று
வருகிறது. குறிப்பிட்ட பகுதியில் பயங்கரவாதிகள் பதுங்கியிருப்பதாகக் கிடைத்த
ரகசியத் தகவலின் அடிப்படையில் தேடுதல் வேட்டை தீவிரப்படுத்தப்பட்டுள்ளது.
இதற்கிடையில் மணிப்பூர் எல்லையில் ஆயுதங்களுடன் ஊடுருவ முயன்ற மூன்று
பயங்கரவாதிகளை ராணுவம் கைது செய்துள்ளது.

மகாராஷ்டிர அரசியல்: புதிய துணை முதல்வர் பதவி ஏற்பு

மகாராஷ்டிர அரசியலில் ஏற்பட்டுள்ள மாற்றங்களைத் தொடர்ந்து,
சுனேத்ரா பவார்
இன்று துணை முதல்வராகப் பதவி ஏற்க வாய்ப்புள்ளதாகத் தெரிகிறது. அஜித்பவார்
மறைவுக்குப் பிறகு காலியான இடத்திற்கு அவரது குடும்பத்தைச் சேர்ந்த ஒருவரை
நியமிக்கத் தேசியவாத காங்கிரஸ் முடிவு செய்துள்ளது. இதற்கு பாஜக உள்ளிட்ட
கூட்டணிக் கட்சிகளும் ஆதரவு தெரிவித்துள்ளன.

இன்றைய முக்கியத் துளிகள்:

• காற்று
  மாசுபாடு: டெல்லியில் நிலவும் கடும் காற்று மாசுபாடு
  காரணமாக இதய நோயால் பாதிக்கப்படுபவர்களின் எண்ணிக்கை முன்னெப்போதும் இல்லாத
  வகையில் அதிகரித்துள்ளதாகப் புதிய ஆய்வில் தெரியவந்துள்ளது.
• ரயில்
  போக்குவரத்து: மகா
  மகோத்சவ விழாவை முன்னிட்டு வாரணாசி மற்றும் எர்ணாகுளம் இடையே கோயம்புத்தூர்
  வழியாகச் சிறப்பு ரயில்கள் இயக்கப்பட உள்ளன.
• விளையாட்டு: பத்தொன்பது வயதிற்குட்பட்டோருக்கான உலகக் கோப்பை
  கிரிக்கெட் தொடரில் நாளை நடைபெறும் விறுவிறுப்பான ஆட்டத்தில் இந்தியா மற்றும்
  பாகிஸ்தான் அணிகள் மோத உள்ளன.